Miulang sa away gipusil

CEBU, Philippines - Usa ka construction worker ang giunay og pusil sa iyang kauban sulod sa usa ka kan-anan sa reclamation area sa barangay Carreta kagahapon sa kaadlawon. Giila ang biktima mao si Enrique Alfon, 31, sakop sa Excel Construction kinsa gipusil sa dughan ni Rolando Canta.Ang biktima ug uban pang kaubanan sa trabaho lakip na ang suspek gikatahong nag-inom sulod sa usa ka kan-anan sa lugar apan sa kalit nagkainitay ang kauban sa biktima nga si Lolito Makaraya ug ang suspetsado. Gisuwayan unta og ulang sa biktima ang duha apan siya na hinuoy gisumbag sa suspek ug nahitabo ang sumbagay tali nilang duha ug nianang tungura mibunot og armas ang suspek ug gidiretso'g pusil sa walang bahin sa dughan ni Alfon. Ang suspek daling midagan samtang ang biktima gidala sa Vicente Sotto Memorial Medical Center. (Lesley Caminade)   (BANAT NEWS)