Computers nga pirated ang softwares gisakmit

CEBU, Philippines - Mokabat sa 16 ka mga establisamento sa dakbayan sa Sugbu ang gironda Pilipinas Anti-Piracy Team tungod sa paggamit og mga way mga lisensya ug pirated nga software sa ilang computer units.

Gikatahong lima sa mga computers ang gikunpiskar sa maong team nga naglangkob sa Optical Media Board (OMB) Philippine National Police (PNP) ug National Bureau of Investigation (NBI-7).

Si Atty. Cyrus Paul Valenzuela, ang legal division chief sa OMB nagkanayon nga ang maong mga computers migamit og di lisensyadong softwares.

Target unta sa grupo ang 20 ka mga establisamento dinhi sa dakbayan apan gumikan sa kaapiki sa panahon napakyas sila pagronda niini. Gitug-an ni Valenzuela nga sagad sa mga mogamit sa walay linsensyang software mao ang mga Call Centers, Internet Cafe's ug mga kompaniya nga sagad gyud mogamit og mga computers.

Ang mga establisamentong nanggamit og computers gihatagan og 20 ka adlaw aron pagkuha sa validity sa ilang mga computer softwares.

Apan ang mga narondang establisamento pulos nangangkong wala silay kasayuran nga peke diay ang mga gi-install nga softwares sa ilang mga units gumikan kay sa pagpalit nila niini naka-install na kining daan.

 Duna say mga kumpanyang padayon pang nag-proseso sa mga lisensya ug ang uban nag-renew pa sa ilang mga lisensya nga bag-uhay ra na-expire. (Guam Logroño)   (BANAT NEWS)