P2 milyones alang sa mag-uuma gihatag sa Drugs Board

CEBU, Philippines - Nihatag og P2 milyones ang Dangerous Drugs Board (DDB) sa lungsod sa Balamban aron iapod sa mga mag-uuma nga magamit pagpananom og lagutmon imbes nga marijuana.

Ang maong kantidad kabahin sa Alternative Development Program sa DDB alang sa mga mag-uumang nananom og marijuana kaniadto aron di na matintal og pananom niini.

Ang pundo gidawat ni Mayor Alex Binghay aron ibutang sa kooperatibang mosuway sa pagpananom og abaka.

Si DDB undersecretary Clarence Paul Oaminal nagkanayon nga ang Balamban maoy una nilang gihatagan sa maong kantidad dinhi sa rehiyon siyete tungod kay mao kini dunay daghang mga mag-uumang nananom og mga marijuana.

Giangkon ni Oaminal nga dunay mga mag-uumang kansang plantasyon sa marijuana naronda na apan namalik pagpananom niini tungod kay walay laing nahibaw-ang alternatibong itanom nga dako og kitaon.

Ang mga lungsod nga isunod mahatagan og budget sa DDB mao ang Badian, ug Dalaguete sanglit naila na usab sila kaayong dunay daghang plantasyon sa marijuana nga naronda. – BANAT NEWS