Junia sa BID tua na sa OPS

CEBU, Philippines - Hingpit nang miluwat sa katungdanan si technical assistant Romeo 'Butch' Junia sa Bureau of Immigration and Deportation (BID) 7 kay mibalhin kini ngadto sa Office of the Press Secretary (OPS) sa Malacanang sugod niadtong Miyerkules.  

Kini sa dihang gisangunan si Junia og katungdanan sa OPS pinaagi ni Press Secretary Cerge Remonde.

 Matud pa ni Junia nga ang pagkabalhin niya ngadto sa buhatan sa OPS way kalambigitan sa panagbangi sa mga opisyal sa BID 7 ug ni Cebu City Assistant City Prosecutor Mary Ann Castro. Matud pa ni Junia nga iya gihapong ipadayon ang kaso nga iyang gipasaka batok ni Castro sa tinguha nga mawagtang sa hingpit gikan sa BID7 ang naulahi.

Nagpangusmo sa kasuko si Junia kay gikiha siya ni Castro og usurpation of function.

Gumikan niini nanimawos usab ang mga kadagkoan sa BID 7 pinaagi sa pagpasaka og kasong extortion batok kang Castro sa buhatan sa Ombudsman Visayas hinungdan sa panagdumot niining mga opisyala hangtod sa pagkakaron. - Bong Soriano (BANAT NEWS)