Mga satellite market bag-o'g supervisor

CEBU, Philippines - Bag-o na karon ang mga market supervisors sa napulo ka satellite markets sa dakbayan sa Sugbu sugod niining semanaha.

Kini maoy gibutyag ni City Market Administrator Racquel Bohol-Arce human usab sa iyang gipatumang lahugay dili pa lang dugay.

Ang reshuffle gipatuman ni Arce tungod usab sa iyang namatikdan nga dili na epektibo sa ilang katungdanan ang ubang market supervisor.

“Dili man gud nato makita ang effectiveness sa usa ka tawo kung magdugay siya sa area, so, naandan na nato nga ato silang i-reshuffle,” sumala ni Arce.Partikular nga gipanghulipan sa market administrator mao ang mga supervisor nga mokapin na sa unom ka buwan sa katungdanan.

Gihatagan lang ni Arce og duha ka semana ang bag-ong mga market supervisor sa pag-adjust ug pagsinati sa ilang area of responsibility.

Gipadayag sa market administrator nga human niini, iya nang pugson ang mga supervisor pagpatuman sa market code sa dakbayan.

“After two weeks ato na silang pahugtan ug kinahanglang ipatuman gyud nila kung unsay nalatid sa atong market code,” dugang sa market administrator.

Partikular nga ipatuman ni Arce sa mga supervisor mao ang pagdili sa merkado nga himuon usab nga pinuy-anan sa mga stallholders.

Usa sa mga satellite market sa dakbayan nga gikatahong dunay daghang namuyo nga mga vendors mao ang Taboan Public Market.

Ang paghawan sa nahisgutang merkado publiko mao unya ang tahas nga atubangon sa bag-ong market supervisor niini nga si Lucino Calvo.

Gihulipan ni Calvo sa katungdanan mao si Efren Saban nga giingong kasamtangan karong gidestino sa buhatan sa mayor. - Elly Bolonos (BANAT NEWS)