Hospital nga magpabayad sa 'trainee' pasilotan

CEBU, Philippines - Gisuportahan sa mga sakop sa hunta probinsiyal ang balaodnon sa ubos balay balaoranan nga nagtinguha sa pagpahunong  ug pagpahamtang og silot sa mga pribado ug pampublikong hospital nga nagpabayad sa mga nursing graduate alang sa ilang training.

Si Provincial Board member Victor Maambong nagkanayon nga ang propesyon sa pagka nursing nakadani sa ubay-ubay nga mga tinun-an sulod na sa pipila ka tuig tungod sa trabaho sa gawas sa nasud ilabina sa Estados Unidos. Apan kinahanglang mag-training og duha ka tuig nga kasinatian sa trabaho sa mga hospital dinhi sa Pilipinas una sila dawaton didto sa gawas.

 Busa alang kang Maambong nga dili makiangayon nga pabayron pa ang mga nurse sa hospital nga ilang bansay-bansayan tungod kay nagserbisyo baya sila diha ug gani mas maayo pang ang hospital maoy mobayad sa ilang serbisyo.

 Gitataw ni Maambong nga usa ka pagpahimulos ug pangabuso sa tagdumala sa mga tambalanan ang ilang gihimo ngadto sa mga nurse ug angayan kining sumpoon ug pitolon ang nagbuhat sa ingon.

 Dugang pa ni Maambong nga angayan nga putlon sa labing daling panahon ang maong pamaagi sa mga hospital ug angay nga pahamtangan og bug-at nga silot kadtong mga nagdumala sa mga tambalanan nga mopahimulos sa mga nursing graduates pinaagi sa pagpabayad sa duha ka tuig nga training. - BANAT NEWS