Enhinyero gi-ambush, patay

CEBU, Philippines - Patay ang usa ka enhinyero human kini gibanhigan sa tulo ka mga lalaki nga nagsakay og motorsiklo didto sa barangay Pitogo lungsod sa Consolacion samtang sakay kini sa iyang sakyanan paingon unta sa opisina kagahapon sa alas 7:30 sa buntag.

Ang biktima mao si Engr. Maliquies Ceballo, 50, minyo ug molupyo sa barangay Cogon, lungsod sa Compostela samtang ang mga suspek gihulagway sa mga saksi nga nagsakay og itom nga motorsiklo nga walay plate number ug tulo ka buok apil na ang drayber niini.

Subay sa inisyal nga imbestigasyon ni SPO1 Recardo Ermac sa Consolacion Police Station ang biktima gikan sa lungsod sa Compostela sakay sa iyang Toyota Hilux kolor itom nga dunay plaka nga GJP-325 paingon unta kini sa iyang opisina sa Ayala Business Park sa siyudad sa Sugbo samtang ang nag-motor nga mga suspek nagsunod kaniya.

Pag-abot sa nahisgutang lugar mikalit og overtake ang motorsiklo ug ang angkas niini maoy mideretso og pusil sa biktima sulod sa walo ka higayon ug pagkaigo sa biktima wala na kini makakontrolar sa manobela ug mibangga kini sa gamay'ng bungtod ug nalimbuwad ang sakyanan niini sa mabaw nga kimba dayong sibat sa mga suspek sakay sa motorsiklo.

Sa pagresponde sa kapolisan naka-recover kini og unom ka mga kabhang sa kalibre .45 ug duha ka deformed slugs sa mao gihapong kalibre nga maoy gituohang gigamit sa mga suspek.

Ang biktima gihulagway nga patay kini dihadiha human makaangkon og unom ka samad pinusilan sa iyang liog, tulo sa dughan ug duha sa iyang kilid.

Subay sa inisyal nga imbestigasyon sa kapolisan ang biktima dunay daghang gikabangi sa ilang lugar ug usa na niini ang problema sa yuta sa ilang lugar nga maoy gitutokan karon sa nagpadayong imbesti-gasyon.

Ang biktima nasuta usab nga igsuon ni SPO1 Cilas Dodong Ceballo nga traffic investigator sa kapolisan sa lungsod sa Compostela. – BANAT NEWS