Negosyante sa catmon patay

CEBU, Philippines - Negosyanting nakatulog sa iyang sakyanan   namatay human gipauwanan og mga bala sa duha ka mamumunong nagsul-ob og bonnet kagahapon sa alas 12:30 sa kaadlawon didto sa Barangay Catmon, Daanlungsud, Catmon.

Si Mondido Aniceto, 43, negosyanti og karne ug taga barangay Flores sa nahisgutang lungsod ang dead-on-arrival sa Juan Dosado Memorial District Hospital sa lungsod sa Sogod human makaangkon og nagkada-iyang samad pinusilan sa iyang kalawasan.

Si PO2 Ronald Wahing sa Catmon Police Station nga nahinabi sa Banat News nagkanayon nga ang biktima sa wala pa kini pusila gikatahong natulog kini sulod sa sakyanang motorsiklo niini nga dunay sidecar nga gi-parking daplin sa dalan sa may Poblacion market sa nahisgutang lugar.

Naabot ang duha ka wala mailhing mamumuno nga nagsul-ob og bonnet nga gitabon sa mga nawong niini ug sa walay daghang pangutana mibunot sa gipangdala niining .45 kalibre nga armas ug gipusil ang biktima   makadaghang higayon.

Gikatahong duna nay mga tawo didto sa merkado niadtong higayona nga sagad niini mangihaway og hayop apan wala gyoy nakaila sa duha ka suspetsado kinsa yano lang nanglakaw human sa krimen.

Human sa pagpamusil, ang duha ka mga suspetsado dali kaayong nakasibat palayo sa nahisgutang dapit samtang ang biktima gidali sa pagdala sa tambalanan apan gideklarar nga DOA sa mga doktor sa tambalanan sa Sogod. – BANAT NEWS