Palupad og tabanog gidili

CEBU, Philippines - Higpit nang gidili karon sa National Transmission Commission (Transco) ang "Kite flying" o pagpalupad og mga tabanog.

Kini tungod sa ka peligro nga malambod ang higot sa tabanog ngadto sa linya sa kuryente ug maoy mahimong hinungdan sa brown-out.

Gawas niini gibutyag usab ni Carmela Castillo, ang officer-in-charge sa Transco nga daghan na kaayong nakabsan sa kinabuhi ning pagpalupad og tabanog kay nakuryentihan.

Nunot niini, giawhag sa Transco ang mga opisyal sa kabarangayan nga mobadlong sa ilang mga molupyo nga magpalupad og tabanog.

Kini aron kalikayan ang dili maayong dangatan sa magpalupad niini ug ingon man ang komunidad gikan mahitabong brown-out.

Sa laing bahin nanginlabot usab ang Kapitolyo ning maong problema , busa si Board member Juan Bolo nagkanayon nga kinahanglan badlongon kadtong mga bata nga magtabanog duol sa linya sa kuryente aron paglikay sa disgrasya. - Rey Pasaporte (BANAT NEWS)