Misulong sa bayaw maoy napatay

CEBU, Philippines - Gidunggab ug gitigbas hangtud namatay sa iyahang bayaw ang usa ka mag-uumang giingong nanulong og away sa suspek diha sa barangay Bali-ang siyudad sa Danao niadtong Martes sa alas 2:00 sa hapon.

Ang biktima mao si Antonio Bataluna, 38, nagpuyo sa dapit samtang ang suspek mao si Reneboy Dawe, 38, usa ka construction worker, nagpuyo gihapon sa maong lugar.

Matud ni SPO3 Arestio Espina sa Danao City police dihang nahinabi sa Banat News, ang biktima nagdala'g kutsilyo nga misulong sa pinuy-anan sa suspek ug nanghagit og patay.

Subay sa inisyal nga imbestigasyon, gidiretso og dunggab sa biktima ang suspek pag-abot niini sa sulod apan ang naulahi nakadagan sa kusina ug mikuha sa iyang sundang dayon gibalikan ang biktima ug mitigbas niini sa ulo.

Wala pa gyud matagbaw ang suspek, giusban niini pagdunggab duha ka higayon ang dughan ug walang bukton ni Bataluna hinungdan sa pagkahagba niini ug dangtan og pipila ka minutos namatay.

Sa pag-responde sa mga polis naglunang na sa kaugalingong dugo ang biktima nga wala nay kinabuhi samtang ang suspek boluntaryong mitahan sa iyang kaugalingon sa kapulisan.

Sa paghimo ning balita wala pa maestablisar sa kapulisan ang motibo sa krimen sanglit nagdumili pagtubag ang suspek sa mga pangutana. - Uban sa report nila ni Romeo Limpangog ug Bong Soriano (BANAT NEWS)