Way nadakpang mga kaskaserong drayber

CEBU, Philippines - Gibutyag sa pangulo sa Land Transportation Office-7 nga si Raul Aguillos nga hapsay ug walay dagkong problemang nasugatan ang mga sumasakay atol sa pagtamod sa Semana Santa sa miaging semana ug ingon man sa ilang pagbalik karon.

Si Aguillos nga nahinabi sa Banat News nagkanayon nga wala usab silay nadawat nga report kabahin sa mga drivers sa minibus nga kusog pagpadagan bisan na gani ang iyang mga sakop sa Oplan Semana Santa nga nagbantay sa National Highway walay nadakpang reckless driving.

Niadtong milabay’ng Miyerkules Santo, ang LTO-7 mipakatap og daghang stickers sa mga sumasakay aron dasigon pagsumbong sa ilang buhatan kung dunay mga drivers nga kusog magpadagan, mahal nga pletihan ug uban pang masugatan nga problema.

Sa habig sa kapolisan gitataw sa pangulo sa kapolisan sa probinsya sa Sugbu, Sr. Supt. Carmelo Valmoria nga malinawon kaayo ang tibuok probinsya atol sa Semana Santa.

Nagkanayon si Valmoria nga di gyud malikayan nga dunay mga panghitabo sa lain-laing lugar sa probinsya apan dili related sa Lenten Season.

“Generally peacefull although dunay mga incidents pero dili related sa lenten season,” paghulagway pang Valmoria. Samtang gitug-an usab ni Aguillos nga karung semanaha ipaubos na sa seminar ang tanang drivers sa EDC Liner, kadtong minibus nga mibangga sa gikasugat niining Isuzu truck sa dakbayan sa Naga sa milabay’ng duha na ka semana nga mikalas og kapin sa napulo ka mga pasahero.

Matud ni Aguillos nga naghulat nalang siya sa rekomendasyon sa Land Transportation Franchising and Regulatory Board (LTFRB)-7 director Romulo Bernardez aron pormal na nilang ipaubos sa safety seminar.  (Rey Pasaporte) (BANAT NEWS)