Bikini open sa Bantayan ipasusi sa provincial police

CEBU, Philippines - Ang direktor sa kapolisan sa lalawigan sa Sugbo Sr. Supt. Carmelo Valmoria mimando sa kapolisan pagsusi sa report labot sa gikatahong pagpahigayon og bikini open sa mga beach resort sa Isla sa Bantayan niadtong Biyernes Santo bisan adunay provincial ordinance nga nagdili niini.

Wala mahimuot si Valmoria sa maong kalambuan hinungdan nga alang kaniya manubag gyud ang mga tagdumala sa nahingtungdang beach resort kun mamatud-an nga mipahigayon og Bikini Open niadtong Biyernes Santo.

Matud pa niini nga iya nang gimanduan ang hepe sa Santa Fe Police Station sa Bantayan Island aron imbestigahun ang report tungod kay siya sa iyang buhatan wala usab siya makadawat niini.

Sumala pa niini nga ang kapulisan makig-alayon sa lokal nga kagamhanan sa pagpatuman sa Executive Order nga giduso ni Gobernador Gwendolyn Garcia nga nagsupak sa maong pasundayag.

Samtang si Supt. Erson Digal, deputy provincial director for administration kinsa mao usab ang Task Force Igmat Commander mitataw nga walay bikini open didto sa Ramil Beach Resort ug Sugar Beach Resort.

Si Digal kinsa didto usab sa maong Isla atol sa Semana Santa mipasabot sa mga tigbalita nga adunay naka-bra apan duna usab kini mga panapton nga gigunting-gunting, ingon man sa underwear nga sama sa Hawaian dance.

Si Garcia   naglaraw karon sa pagpasakag kaso sa mga tagdumala sa nahisgutang beach resort.