2 patay tungod sa donsol

CEBU, Philippines - Namatay gyud sulod sa tambalanan ang duha sa unom ka mga tawo nga nahilo sa gikaon nga adobong donsol sa miaging Sabado sa gabii sa sitio Soong, barangay Mactan, dakbayan sa Lapulapu.

Ang namatay mao ang 10-anyos nga batang babaye nga si Mary Jean Rumbo ug si Abundio Gulbe, 53, samtang padayong giatiman sa mga mananambal sa Vicente Sotto Memorial Medical Center ang laing upat.

Si PO1 Jezzel Fal-ing sa Lapulapu Police Station miasoy sa Banat News nga human madala sa Lapulapu City District Hospital si Gulbe ug Rumbo, uban nilang Jonalyn Rumbo, 31, Joemarie Rizalina, 29, Climaco Gulbe, 24 ug Renato Gulbe, 33, human mangahilo sa donsol gibalhin sila sa Vicente Sotto Memorial Medical Center.

Nunot sa trahedya, si Department of Health (DOH-7) regional director Susana Maderieta mimando og imbestigasyon.

Si Dr. Rodulfo Berame, health officer sa dakbayan sa Lapulapu, misanong sa kamanduan ni Maderieta pag-imbestigar sa maong trahedya.

Gimando ni Maderieta ang pagpa-ubos sa laboratory test sa donsol nga gikaon sa unom ka mga tawo aron masayran ang hinungdan nganong makahilo kini.

Gitataw niya nga ang donsol dili makahilo, sukwahi sa isdang botete nga makahilo sa tawo nga mokaon niini.

Nagtuo hinuon ang direktor sa DOH-7 nga wala matarong sa paglimpyo ug pagpreparar pagluto niini.

Nagtuo usab si Maderieta nga nadaot na o na-contaminate sa kemikal ang donsol nga gikaon sa unom hinungdan sa ilang pagkahilo.

Tungod sa insidente, gipahimangnoan ni Maderieta ang publiko sa pagmabinantayon ug dili magpataka og kaon sa mga produktong makuha gikan sa dagat, ilabi na kun dili maayo sa paglimpyo. Gipahimangno usab niya nga dili magpataka og kilaw ang mga tawo sa mga produktong makuha gikan sa dagat.

Ang Bureau of Fisheries and Aquatic Resources (BFAR-7) misugod na usab sa ilang imbestigasyon.