Pabor nga sunugon ang mga tigbakayan

CEBU, Philippines - Pabor si Cebu City ABC president Eugenio “Jingjing” Faelnar sa gihimo sa kapolisan pagsunog sa ruwedahan diha sa Talamban ug ingon man sa uban pang masakpang illegal nga tigbakayan sa dakbayan.

Kini bisan pa man kung giangkon sa ABC president nga siya manigbakay usahay kung dunay okasyon sa usa ka barangay.

Ang reaksyon ni Faelnar iyang giluwatan human sunuga sa mga polis ang ruwedahan sa tigbakayan diha sa barangay Talamban niadtong miaging semana.

Matud pa niini husto ang gihimo sa kapulisan kung tinuod nga kini makapila na makadawat og reklamo batok sa nahisgutang tigbakayan.

Nagtuo si Faelnar nga pinaagi sa pagsunog sa ruwedahan, mahunong gyud unya ang maong matang sa illegal nga sugal.

Nipahimangno hinuon si Faelnar nga kung sunugon sa mga polis ang ruwedahan siguruhon lang niini nga walay maamong nga pinuy-anan.

“Siruguhon lang nga walay maamong kay tingali og masunog na hinoon ang kasikbit nga mga balay ka dako na hinuong problema,” sumala ni Faelnar.

Atol sa pagsunog sa mga sakop sa Special Weapons and Tactics, Mobile Patrol Group ug Talamban police station sa KM-77 sa Talamban mipasangil ang pipila ka mga molupyo nga giapil og sunog ang ilang kabtangan lakip na mga hiniktan.

Ang mga reklamante giingong desididong mopasaka og kaso batok sa mga polis nga nalambigit sa maong ronda. – BANAT NEWS