2 polis nakigpinusilay sa 3 tawo

CEBU, Philippines - Lima ka oras human sa pinusilay sa tulo ka mga tawo batok sa mga polis, usa sa mga suspetsado napalgang patay nga naglutaw sa suba didto sa Sitio Sudtungan barangay Basak dakbayan sa Lapulapu atol sa Biyernes Santo.

Ang napalgang naglutaw mao si Dante Sumalinog Baguio alyas Tacio, 34, ulitawo, residente sa   Ibabao, lungsod sa Cordova ug usa ka traysikad driver.

 Sa imbestigasyon ni SPO3 Rex Ybañez ug SPO2 Rolito Jumao-as sa Homicide Section, nasuta nga si Baguio maoy usa sa mga suspetsado nga nakapinusilay nila ni POI Rena Bintulan sa PNP Regional Comptroler Division ug si PO1 Archel Tero sakop sa PNP Regional Crime Laboratory nga mga residente usab sa maong dapit nga miresponde atol sa nahitabong pagpamusil sa tulo ka mga tawo.

Sa pakighinabi sa Banat News, ni Rogelio Limpangog alyas Junio, 45, ulitawo residente sa susamang dapit ug usa ka construction worker, mitug-an nga sa wala pa mahitabo ang pinusilay tali sa mga polis ug sa tulo ka wa mailhing tawo nga mipusil usab ni Limpangog nga mga ala-una sa kadlawon sa Biyernes Santo   uban siya sa iyang duha ka higala natulog sa usa ka waiting shed daplin sa baybayon. Kalit nga mitunga ang tulo ka tawo nga adunay gigukod ug sa pagbalik pa ni Tacio kalit lamang silang gipamusil hinungdan nga samaran si Limpangog sa iyang walang tiil.

Gumikan niini, si PO1 Bintula ug PO1 Tero nga residente sa maong dapit bisan off duty miresponde kini sa maong pagpamusil hinungdan nga nagka-engkwentro kini sa grupo ni Tacio.

Gumikan sa kangitngit sa maong dapit dili makasiguro ang duka ka polis nga ilang naigo ang mga suspetsado hangtod nga sa mga alas 6 sa buntag sa susamang adlaw si Baguio napalgang patay nga naglutawlutaw sa suba diin nasuta nga aduna kini pinusilan sa iyang suwang ug sa tiyan.

Matud pa ni SPO2 Jumao-as posibleng samaran si Baguio atol sa maong pinusilay ug sa dihang misibat kini didto kini mahulog sa suba ug nakabsan sa kinabuhi.

Samtang si PO1 Tero ug PO1 Bintulan nasagmuyo kay ang ilang gikaengkuwentro ila ra usab   nga paryente, samtang nagpadayon usab ang imbestigasyon kun unsay kalapasan nga nahimo sa duha ka mga polis. - Bong Soriano (BANAT NEWS)