Duha ka batan-on gipusil sa 2 insidente

CEBU, Philippines - Patay dihadiha dayon ang usa ka batan-on human kini pusila sa makadaghan nga higayon sa duha ka wala mailhing lalaki sa Sitio Puntod Alaska, barangay Mambaling pasado alas 10 sa miaging gabii.

Si Leonardo Amora Galido alyas Amay, 23, molupyo sa nahisgutang lugar gidul-itan sa pagpusil sa usa sa duha ka wala mailhing lalaki.

Base sa pasiunang imbestigasyon sa kapolisan nasayran nga ang biktima naglingkod-lingkod daplin sa karsada duol lang sa ilang panimalay.

Apan sa dihang adunay duha ka wala mailhing lalaki   miduol kaniya nga ang usa niini kalit lang nga mihulbot sa kalibre .45 nga pistola ug mipabuto sa walay igong hinungdan. Bisan pa man sa samad pinusilan nga naangkon daling nakadagan ang biktima.

Apan ang duha ka lalaki wala pa makuntinto mipabuto pa kini sa makaduha ka higayon hinungdan nga natumba ang biktima ug maoy hinungdan sa hinanaling kamatayon niini.

Samtang ang duha ka lalaki daling nakasibat palayo sa nahisgutang lugar nga nagtiniil paingon sa barangay Duljo-Fatima.

Nakaangkon og samad pinusilan ang biktima sa luyo nga bahin sa iyang lawas ug tuong bahin sa iyang dughan ug walang bahin sa iyang bukton.

Gisuwayan pa unta pagdala sa iyang silingan diin siya natumba ngadto sa Cebu City Medical Center aron unta maluwas ang kinabuhi apan gideklarar na kini nga dead on arrival.

Sa pakisusi sa kapolisan ilang nakuha sa crime scene ang tulo ka kabhang sa kalibre .45 nga pistola nga maoy gigamit sa pagpamusil patay sa biktima.

Matud pa ni PO3 Victor Ruel Ayuman sa Homicide Section sa pakighinabi sa Banat News nga ang biktima base usab sa gipang-ingon sa mga nakasaksi nga adunay panahon nga usa siya ka “mamurakay” sa nahisgutang dapit.

Samtang sa laing bahin, napusilan usab ang usa ka batan-ong lalaki gikan nga nakig-estorya sa iyang mga higala ug uyab daplin sa karsada pasado alas tres kagahapon sa buntag sa B. Aranas Extention, barangay Duljo-Fatima.

Si John Joseph Crismal, 18, usa ka 2nd year high school sa Gullas High School ug molupyo sa nahisgutang dapit napusilan sa giilang si Bobby Buro ug nganlang Otik.

Base sa imbestigasyon sa kapolisan nga ang biktima padulong na unta mouli sa iyang panimalay human kini nakig-estorya-estorya sa iyang mga higala ug uyab gawas sa ilang panimalay.

Sa dihang kalit lang nga adunay mibutho sa iyang atubangan ug deretso og pabuto sa armas nga dala niini.

Samtang ang duha ka suspetsado daling nakadagan palayo sa nahisgutang lugar ug ang biktima nga nakaangkon og samad pinusilan sa iyang tiyan daling gidala sa Cebu Ctiy Medical Center.

Si PO3 Ayuman nagkanayon nga posibleng adunay kalambigitan ang pagpamusil sa panag-away sa isig ka grupo sa fraternity tungod kay ang suspetsado gikatahong miyembro man og usa ka fraternity. (BANAT NEWS)