CEBU, Philippines - Gihulagway sa presidente sa mga barangay kapitan sa dakbayan sa Lapulapu nga ilegal ang paglingkod og balik sa barangay kapitan Canjulao nga si Rufo Bering kagahapong adlawa sa iyang barangay.
Si Lapulapu City Association of Barangay Captains President Leo Mercado sa pakighinabi sa Banat News nagkanayon nga klaro ug tataw kaayo ang kamandoan sa Ombudsman Visayas nga i-implementar gyud ang suspension order nga duha ka bulan.
Kini kabahin sa kasong administratiba nga gipasaka sa iyang kanhing SK Chairman nga miakusar nga iyang gikulata sulod sa barangay hall niadtong Disyembre 2007.
Giklaro ni Mercado nga dili kini kamanduan ni Lapulapu City Mayor Arturo Radaza.
Apan isip usa ka residente sa maong dapit adunay katungod si Bering nga motunga sa hall sa Canjulao apan dili siya makahimo sa mga transaksiyon sa maong barangay gumikan sa iyang pagkasuspenso.
Si Bering dihang gikuhaan og pamahayag mipadayag nga wa nay gibug-aton ang kamandoan sa Ombudsman pagsuspenso kaniya gumikan kay misang-at na siya og "motion for reconsideration" sa maong buhatan maong di na kini ‘final and executory.’ Gipasabot ni Bering nga mibalik siya sa paglingkod kagahapon isip kapitan sa Canjulao gumikan sa pagkapupos sa iyang "sick leave" sa miaging petsa 7 ning bulana sukad niadtong Marso 27 ning tuiga. (BANAT NEWS)