CEBU, Philippines - Hayan mag-atubang na usab og laing kaso ang municipal treasurer sa lungsod sa Tudela nga si Rizalita Roble tungod sa kapakyas sa pagtambong sa iyang trabaho diha sa munisipyo sulod na sa pipila ka mga adlaw ug wala na hisayri hain napunta ang koleksyon sa buhis sa lungsod.
Ang assistant municipal treasurer sa maong lungsod nga si Restituto Alguedo mireklamong ang mga nakolektang buhis sa lungsod wala ma-deposito ni Roble sa bangko.
Matud pa ni provincial treasurer Atty. Roy Salubre nga dako gyud og tulubagon si Roble kun masuta sa record sa cashbook sa lungsod sa Tudela nga tinuod ang reklamo ni Alguedo.
Si Salubre nagkanayon nga nahibawo nang daan si Roble sa polisiya sa gobiyerno nga ang koleksyon sa mga buhis sa usa ka Local Government Unit gikinahanglang ideposito dayon sa bangko aron pagsigurong dili magamit sa politika ug uban pang katuyoan ang kwarta.
Kun may basehanan ang maong alegasyon hayan laing kasong malversation of public funds ang atubangon ni Roble.
Nasayran nga si Roble uban kang Tudela mayor Rogelio Baquerfo gipasakaan nila ni Governor Gwendolyn Garcia, Tudela vice mayor Client Maratas ug ubang mga konsehal og kasong dereliction of duty; abuse of authority; kalapasan sa anti-graft and corrupt practices act ug kalapasan sa Code of Conduct and Ethical Standards for public officials and employees ngadto sa Ombudsman Visayas tungod sa pagdumili sa paghatag sa suhulan sa mga kawani sa Tudela.
Samtang gipahibawo usab ni Salubre nga gitahasan siya ni Garcia nga adtuon ang buhatan sa Bureau of Local Government Finance sa Manila aron masuta ang tubag sulat-hangyo sa probinsiya nga pabalikon gyud si Roble sa munisipyo.
Ang maong lungsod nakasinati og mga problema gumikan sa panag-ilog ni Mayor Demetrio Granada ug Bacquerfo sa pwesto pagkamayor nga hangtud karon wala pa maresolbar ug walay usa ang buot mopalugar hinungdan nga ang mga konstituwente nalibog usab kun asa modangop. (BANAT NEWS)