Bomb scare sa terminal nakapaukay

CEBU, Philippines - Naukay ang pipila ka mga pasahero sa Cebu South Bus Terminal nga mopauli sa ilang tagsa-tagsa ka lungsod kagahapon sa udto tungod sa usa ka dakong karton sa sigarilyong gibilin nga gituohan nilang bomba.

Ang mga sakop sa Special Weapons and Tactics kon SWAT sa Cebu City Police Office pinanguluhan ni PO3 Marcelo Lerio nga nahinabi sa mga tigbalita nagkanayon nagduda ang mga sumasakay sa maong kahon ug mipahibalo sa nagbantay'ng polis.

Gikatahong nagduda ang mga PNP ug mga security sa South Bus Terminal nga bomba kini gumikan kay mga pasado alas -10 pa kini sa buntag nga nakit-an sa maong dapit ug alas 12 nalang sa udto wala gihapon kini punita sa tag-iya.

Gumikan niini ang mga gwardiya ug mga polis mipasidaan dayon sa mga tawo nga di mopaduol sa gihimutangan sa maong karton samtang gitawgan pa ang SWAT. Dihang naabot ang grupo ilang nakit-an ang usa ka dudahan kaayong dakong cartoon nga gibilin tungod sa usa ka haligi mga 10 metros ang gilay-on gikan sa main entrance sa South Bus Terminal.

Dali nilang gipa-cordon ang area ug gipasibog ang mga sakyanan ingon man mga pasahero aron masiguro ang ilang seguridad kun ugaling matinuod man nga usa kini ka Improvised Explosive Devise (IED).

Ang maong karton gidala sa SWAT sa South Reclamation Project (SRP) aron usab didto kini ipa-disarm apan mao nalay kakugang nila dihang ang mga sulod niini pulos kagamitan sa kusina ingon man kurtina.

Ang maong karton dunay pangalan ug address sa usa ka Moises Palisbo Jr. taga Balite Drive Suarez, Iligan City ug kontak number nga 09182947680.

Si PO3 Lerio nagtuong nahabilin lang sa tag-iya ang iyang bagahe hinungdan nga ilang gi-turn-over og balik sa mga tagdumala sa terminal.

Hinuon, bisan paman sa pagbalda og makadiyot sa operasyon sa terminal wala hinuon mo-panic ang mga pasahero. – BANAT NEWS