Turista sa North Cebu mikunhod

CEBU, Philippines - Mikunhod og 20 ngadto sa 30 porsiyento ang gidaghanon sa mga turista nga nangadto sa lungsod sa Daanbantanyan atol sa Holy Week sumala pa ni Bise Mayor Maria Luisa Loot sa lungsod sa Daanbantayan tungod sa nasinating krisis sa tibuok kalibotan.

Matud sa bise mayor nga dako kaayo og epekto ang nasinating krisis sa pagkakaron gumikan kay mas niminus gyud ang gidaghanon sa mga turistang mibisita sa ilang lungsod.

Usa sa timailhan niini mao ang gidaghanon sa mga bakanteng kwarto sa mga beach resorts kun itandi sa nangaging milabay nga pipila ka bulan.

Sahi sa lungsod sa Bantayan, ang mga kuwarto sa mga beach resorts sa pagkakaron puno na ug duna pay nagpareserba nang mga turista.

Si Mayor Geraline Escario sa Bantayan nagkanayon nga walay mga balay kahilayang makapasundayag og mga malaw-ay'ng palabas atol sa Semana Santa, kini bisan gihulagway sa uban nga pista ang mao nga higayon sa ilang dapit.

Midugang ang mayor nga nangayo na siya og augmentation force sa pangulo sa kapolisan sa Probinsya sa Sugbu, Sr. Supt. Carmelo Valmoria aron   maoy mopatunhay sa kahapsay ug kalinaw sa tibuok Isla sa Bantayan atol sa maong mga adlaw. – BANAT NEWS