Katabang nakakawat' og P200 mil

CEBU, Philippines - Usa ka negosyante og bugas sa merkado sa Carbon ning dakbayan sa Sugbo ang nawad-an og P200 mil nga giunay og kawat sa iyang katabang sa miaging buntag.

Ang biktima mao si Rogelio Lequigan, 48, minyo nga taga sitio Panagdait, barangay Mabolo, dakbayan sa Sugbo, samtang ang suspek si Rolando Bordago, hingkod nga taga Guihulngan, Negros Oriental.

Base sa pasiunang imbestigasyon sa Cebu City Police Office Theft and Robbery Section nasuta nga ang suspetsado milayas nga wala magpahibawo sa biktima nga maoy iyang amo ug gidala ang halin sa tindahan nga mikabat og P200 mil.

Miasoy ang biktima nga bisi kaayo siya niadtong higayona samtang nagbantay sa iyang tindahan sa Unit 2 sa Carbon, busa wala niya hibantayi nga gikiriw sa suspek ang mga halin niini diha sa hunos.

Sa pagkakaron naglaraw ang kapolisan nga ila kining adtuon sa Guilhulngan basin mipauli kini ngadto sa ilang lugar. - Lesley Caminade (BANAT NEWS)