CEBU, Philippines - Nasikop sa mga otoridad ang usa sa duha ka mga tawo kinsa nagpayuhot og mini nga salapi sa Sitio Tagaytay barangay Can-asujan bukirang bahin sa siyudad sa Carcar niadtong Lunes sa alas 5:00 sa hapon.
Ang nasikop mao si Nelson Rovez, 33, minyo, lumad nga taga siyudad sa Danao apan kasamtangang nagpuyo sa Sitio Dapdap, Poblacion-III , Carcar.
Ang kauban niining wala ikabutyag ang ngalan wala masikop kay nakaikyas dala ang bag nga puno sa salapi nga mini.
Ang mga biktima mao sila si Alberto Saraom, 45, minyo, ug Luz Dayanan, 36 , minyo nga pulos taga Tagaytay.
Matud ni SPO1 Joel Panaganan sa Carcar City Police nga mipalit og usa ka kahang sigarilyo ug mga linata nga mibalor og P70 ang mga suspek sa tindahan ni Saraom ug wala hibantayi sa biktima nga mini nga P500 ang gibayad sa mga suspek hinungdan nga nasuklian kini niya og P430.
Tungod kay nagsakay og motorsiklo, dali ra kaayong nakapadagan pahilayo sa tindahan ni Saraom ang mga suspetsado unya namalit na usab kini og usa ka kaha nga sigarilyo nga balig P20 sa tindahan ni Dayanan ug laing mini nga P500 ang gibayad niini.
Apan walay suwerte ang mga suspetsado tungod kay nabantayan ni Dayanan ang ilang mini nga kuwarta busa ang naulahi dali kaayong nakatawag sa silingan nilang barangay tanod.
Diha-diha nadakpan dayon si Rovez, apan ang iyang kauban nga maoy nagmaneho sa motorsiklo nakasibat dayon dala ang usa ka bag nga napuno sa mini nga tag P500.
Sa pagkakaron nagtingkagol na sa prisohan sa kapolisan dakbayan sa Carcar ang suspek samtang padayon pang gipangita sa kapolisan ang iyang kauban. - Darrel C. Carumba (BANAT NEWS)