CEBU, Philippines - Mihiwasa ug mireklamo ang mga asawa sa mga relihiyosong pundok sa dakbayan sa Lapulapu gumikan sa paghitak sa mga pasundayag nga hinuboay sa kababayen-an sa maong lugar.
Usa sa mireklamo mao ang asawa sa usa ka estudyante sa abogasiya tungod kay pirme kunong makaadlawonan pag-uli ang iyang bana kay masangit nianang lami kaayong tan-awon nga mga lawas ni Eva.
Ang maong asawa kansang ngalan gipugngan sa Banat News mibutyag nga gidimalas ang iyang bana kay wala gyud kagraduwar sa iyang kurso kay nabuang sa pagpunay og sil-ing sa matintalon ug nindot kaayong pagkalalik nga mga lawas sa mga babayeng wala nay sapot ug magsinaw-sinaw nalang ang panit sa kahamis unya moikid-ikid, moigwad-igwad ug magpangamay sa mga lalakeng magsud-ong kanila kinsa maglaway sa hilabihang gana.
Si Department of Interior and Local Government (DILG) Undersecretary Lito Ruiz nga nahinabi sa Banat News atol sa Kapihan sa DyKC sa dakbayan sa Mandaue miingon nga nakadawat usab siya og susamang reklamo.
Si Usec. Ruiz miingon nga katungdanan sa kapolisan, Philippine Drug Enforcement Agency (PDEA) ug uban pang law enforcer ang pagpakgang sa maong hubo-hubo.
Giklaro niya nga dako usab og kaakohan ang mga lokal nga opisyal sa dakbayan sama sa mayor ug ingon man ang mga opisyal sa kabarangayan. – BANAT NEWS