2 ka tawo gikan sa inom gipamusil

CEBU, Philippines – Duha ka mga lalaki ang gipamusil samtang paingon na silang mamauli gikan nga nag-inom sa bukirang bahin sa barangay Tubod lungsod sa Sibonga niadtong Domingo sa alas 2:20 sa kaadlawon.

Ang mga biktima nga pulos nalandig sa tambalanan mao sila si Gerardo Suerte, 42, ug Walter Santander, 29, pulos molupyo sa nahisgutang lugar.

Ang gidudahang suspek mao si Margarito Cabrera, 38, usa ka mag-uuma ug molupyo ra usab sa nahisgutang lugar.

Matud ni PO2 Dante Molo sa Sibonga police dihang nahinabi sa Banat News ang mga biktima ug suspek nag-uban ra ug nag-inom sa tindahan sa suspek human nakabuno ang ilang manok nga gitari nianang adlawa.

Apan nianang pagkakaadlawon dihang paingon na nga mopauli ang mga biktima giatangan sila sa ngitngit nga lugar ug dayon gipangrakrakan makadaghang higayon.

Si Suerte naigo sa iyang bugan samtang si Santander naigo usab sa sampot ug walang batiis dayon gihatod sa Vicente Sotto Memorial Medical Center (VSMMC).

Samtang ang suspek nisibat human sa hitabo apan nadakpan usab kini dayun atol sa gipahigayong hot pursuit operation sa kapulisan.

Sumala pa sa kapolisan gibana-banang sobra sa 10 ngadto sa 15 ka mga sunod-sunod nga buto sa armas ang nabati sa mga biktima atol sa pagbanhig nga gidudahan nilang gikan sa usa ka KG-9 submachine pistol. Ang suspek hugtanong mihimakak sa pasangil sa duha tungod kay kauban pa niya kining nanari ug gani nag-inom pa sila diha sa ilang tindahan human makadaug ug niuna sab siya og biya sa ilang tapok. (Darrel Carumba) (BANAT NEWS)