Bikini Open sa lalawigan dili pahatagan og permit ni Gwen

CEBU, Philippines – Ang kagamhanan sa lalawigan di mohatag og permiso sa bisan unsang mga bikini shows ug uban pang malaw-ay'ng mga pasundayag sa lalawigan ug did-an usab ang mga lokal nga kagamhanan sa mga lungsod paghatag niini sa mga organizers.

“I will see to it that obscenity and vulgarity, which are the essence of bikini shows, shall have no place in the Province of Cebu,” matud pa ni Gov. Gwendolyn Garcia.

Matud pa sa gobernador ang maong mga matang sa pasundayag usa ka matang sa pagpaubos sa kadungganan sa kababayen-an bisan paman kini gikunsiderar nga contests.

Ang mga bikini shows kun bikini open mopasundayag og mga babayeng magsuot lang og bikini atubangan sa mga tumatan-an, sagad kini buhaton sa mga resorts ug mga kan-anan nga namaligya og mga ilimnong makahubog.

Sagad sa mga parokyano sa maong mga pasundayag pulos kalalakin-an diin ang mga contestants magpanindotay og paso ug porma sa ilang mga lawas atubangan sa naghugyaw'ng kalalakin-an.

Gisuportahan usab sa gobernador ang panawagan sa Simbahang Katoliko nga badlungon ang mga establisamentong mopasundayag niini.

“I fully support them,” matud pang Garcia, kinsa nidugang nga iya nang gimanduan ang legal officer nga si Marino Martinquilla nga andamon ang Executive Order nga nagmando sa tanang mayor sa kalungsoran nga sundon ug ipatuman ang Provincial Women’s Code.

Ubos sa Section 5 Article 1 of the Ordinance 2005-18 sa Women’s Code gidili ang mga beauty contest nga magbutang sa mga kandidata sa abuso sama sa pagtratar kanila nga mga kahimanan sa paghilawas kon “sex objects.”

Lakip ang pangulo sa kapolisan sa lalawigan nga si Sr. Supt. Carmelo Valmoria gimandoan na usab nga monitoron ang mga susamang pasundayag.

Niadtong Nobiyembre sa tuig 2007, nasaksihan ug naeskandalo og maayo ang gobernador dihang miadto sa imbitasyon sa kapistahan sa lungsod sa Boljoon kabahin sa ‘beauty contest’ gumikan kay gihulagway sa gobernador nga bastos ug eskandalosong ‘beauty contest’ ang iyang nasaksihan ug mi-walk out kini dayon sa maong pasundayag.

Ang maong pasundayag maoy nakaingon nga nagdumili na si Garcia sa paghatag og financial assistance sa mga magsaulog og kapistahan.

Nibahad hinuon ang gobernador ngadto sa mga local chief executive ug public officials nga mopasaka siya'g kaso batok niadtong mga opisyales nga nakalapas sa provisions sa Provincial Women’s Code. (Rey Pasaporte) (BANAT NEWS)