Natagak gikan 3rd floor patay

CEBU, Philippines – Ang namatay giila sa kapulisan nga si Alger Cabalay, 23, taga barangay Purok Bugas sa lungsod sa Badian nga trabahante sa usa ka construction firm nga maoy nitrabaho diha sa karaang SSS building sa nahisgutang dapit.

Ang biktima gidali pagdala sa iyang mga kaubanan sa CCMC ug gi-bagging (aron makaginhawa) nianang pagkabuntag sa mga doktor sa emergency room ug dayon gidiretso sa x-ray room aron matino ang kadaut nga nahiaguman niini.

Apan usa sa attending nurses sa CCMC nga wala magpaila nga gikahinabi sa Banat News mga alas 2:00 pasado kagahapong adlawa mibutyag nga alas 12:30 nakabsan sa iyang kinabuhi si Cabalay.

Gikatahong grabe ang pagdugo sa ulo sa biktima gumikan sa fracture kun liki sa bagol-bagol bunga sa pagkatagak gikan sa maong edipisyo ngadto sa kinaubsan.

Midumili sa paghatag og pamahayag sa Banat News ang mga kaubanan ni Cabalay nga naghatud kaniya sa maong tambalanan kabahin sa nahitabo.

Apan si SPO1 Henry Orbiso, imbestigador sa Homicide Section sa Cebu City Police Office nga gikahinabi sa Banat News base sa pamahayag sa mga kaubanan ni Cabalay, kalit nga nahunlos ang kahoy nga gipatungan niini ug nalahos og kahagbong.

Gikatahong adunay gisusi ang maong panday sa roof deck apan samtang naglatay sa maong kahoy nahitabo ang aksidente.

Matud pa ni Orbiso, ang mga kaubanan ni Cabalay mitug-an nga nag-una ang ulo sa biktima dihang kini nagpadulong na sa ubos hinungdan sa grabeng kadaot sa iyang ulo ug uban pang parte sa iyang lawas pagtugpa sa ubos.

Si Orbiso mibutyag nga ang project engineer niini nga si Mel Manreal ang mipasalig nga ilang hatagan og financial assistance ang mga kabanay sa biktima.

Gihulagway sa kapulisan nga aksidente ang maong hitabo ug posibleng gumikan kini sa kumpiyansa sa maong panday sa gitungtungang kahoy. –BANAT NEWS