Wanted sa pagpanulis nadakpan

CEBU, Philippines - Nadakpan sa kapulisan ang usa ka wanted sa kasong pagpanulis atol sa checkpoint sa kapulisan diha sa pantalan sa barangay Talisay lungsod sa Sta. Fe Isla sa Bantayan pagpangandam sa higpit nga seguridad nunot ning nagsingabot nga selebrasyon sa Semana Santa.

Ang nadakpan mao si Rolando alyas Randy Batobalonos, molupyo sa sitio Matiamban, barangay Ocoy ug dunay pending warrant of arrest sa kasong pagpanulis nga dunay piyansa nga P24 mil pesos.

Ang warrant of arrest sa suspek giluwatan niadto pang petsa 8 sa bulan sa Septiyembre sa 2006 nga pirmado ni Danao City RTC branch 25 judge Sylva Aguirre Paderangga.

Ang kapolisan sa Sta. Fe pinanguluhan ni Insp. Rolando Eballe nagmonitor sa mga motoristang manulod ug manggawas sa pantalan nakasigpat sa suspek niadtong Sabado sa hapon sakay sa itom nga motorsiklong Yamaha nga dunay plakang 7AJC1986.

Dihang gisita sa mga polis, ang subpoena server nga usa sa mikuyog sa checkpoint nga si PO3 Juanito Yunting nakamay-ong sa dagway niini nga maoy dugay na nilang gipangita hinungdan nga ila kining gidakop. – BANAT NEWS