Biktima sa 'salvage' wala pa mailhi

CEBU, Philippines - Lalaking gituuhang gi-salvage ug gilabay sulod sa duha ka garbage bags diha sa South Coastal Road sa barangay san Roque sa dakbayan sa Talisay wala pa mailhi sa kapolisan.

Samtang giangkon usab sa kapolisan nga wala pa sila makakuha og lead aron matumbok kun si kinsa ang mipatay sa biktima nga gituuhang sakop Alpha Kappa Rho (AKRHO).

Ang patay'ng lawas diha mapalgi duol sa Evergreen Cemetery sa maong lugar apan gituuhang sa laing lugar kini gipatay ug diha ra gibilin sa mga mamumuno.

Si Supt. Henry Biñas sa pakighinabi niini sa Banat News kagahapon nagkanayon nga padayon pa sila sa pagpahigayon og follow-up sa maong kaso.

Matud niini nga wala pay nagpailang mga paryente sa biktima aron mo-claim sa patay'ng lawas nga nahimutang karon sa Saint Francis Funeral Homes sa Natalio Bacalso Avenue, dakbayan sa Sugbo.

Gibutyag ni Biñas nga duna sila'y katahap nga dili lang usa ka tawo ang mipatay sa biktima ug dunay posibilidad nga grabe ang kasuko sa maong mga tawo tungod sa pamaagi sa pagpatay nga halos natusak sa bala ang lawas sa biktima.

Sa paghiling sa mga sakop sa Scene of the Crime Operative (SOCO) nasuta nga ang patay'ng lawas duna kini lima ka samad pinusilan sa buko-buko, duha sa dughan ug sa walang dunggan.

Gikataho nga dunay usa ka multicab ang mipundo diha sa lugar sa wala pa mapalgi ang patay'ng lawas apan walay bisan usa sa mga residente sa lugar ang nakakita kung kinsa ang naglabay sa maong tawo.

Ang kapolisan sa dakbayan sa Talisay nakig-alayon na sa Cebu City Police Office aron mailhan ang nahisgutang patay. – BANAT NEWS