... Hepe sa duha girelibohan

CEBU, Philippines - Gimando sa kadagkuan sa Cebu Provincial Police Office ang lawom nga imbestigasyon sa nahitabong pagpusil sa usa ka polis ngadto sa iyang kaubang polis sulod sa ilang presinto diha sa lungsod sa San Francisco, Camotes kagahapon sa kaadlawon.

Samtang tungod sa nahitabo girelibuhan sa iyang katungdanan ang hepe sa maong police station nga si Sr. Insp. Larrobis ug gimanduang anha ibutang sa Security Service Group (SSG) samtang gihimo ang imbestigasyon sa kaso ug batok kaniya isip hepe sa duha ka mga sakop.

Kini maoy gibutyag ni Supt. Erson Digal ang Deputy Provincial Director for Administration sa Cebu Provincial Police Office mahitungod sa pagpusil ni PO3 Ananias Mortejo kang PO2 Edward Barrameda, 32.

Si Digal nga gikahinabi sa Banat News nagkanayon nga iya nang gimanduan si Police Insp. Ruben Cuizon ang hepe sa Provincial Investigation and Division Branch nga imbestigahon ang insidente.

Buot ni Digal nga makuhaan sa ilang tagsa-tagsa ka affidavits ang suspetsado ingon man tulo nila ka mga kaubang sila si SPO1 George Yap, PO3 Francisco Codiñera ug PO1 Mamirod Canasina lakip na ang usa ka sibilyan nga diha pagkahitabo.

Matud pa ni Digal nga dili sad makalingkawas sa imbestigasyon ang hepe nga si Larrobis.

Samtang si Supt. Eduardo Saavedra ang overall Island Supervisor sa Camotes maoy iyang gitudlong Officer-in-Charge sa biyaang pwesto ni Larrobis samtang nagpadayon pa ang imbestigasyon.

Nasayran nga si Larrobis daan nang gikatakdang hulipan sa iyang pwesto sa wala pa ang insidente sa duha niya ka mga sakop human kini pasakai og kasong administratiba ni Digal tungod sa pagbiya sa iyang pwesto sa milabay'ng tuig.

Si PO3 Mortejo ipa-ubos sa paraffin test ug gitanggong karon sa karsel sa Talisay City.

Samtang ang patay’ng lawas ni PO2 Barrameda gikatakdang dalhon karong adlawa sa Sugbu aron ma-autopsy.

Mipadayag si Digal nga nasubo gyud ang ilang organisasyon sa nahitabo sa duha gumikan kay pareho silang tigpatuman sa balaud ug karon nag-unay na hinuon gumikan sa personal nga panagbangi.

Giawhag ang mga sakop sa kapulisan nga kun ugaling duna silay mga panagbangi kinahanglang magpabiling kalmado sa ilang kaugalingon ug kun dunay kasaypanan ang usa angayang ilaha kining ipahibalo ngadto sa ilang mga labaw’ng opisyal aron ma-resolbar dayon. – BANAT NEWS