Polis gipatay sa kaubang polis

CEBU, Philippines - Patay ang usa ka polis human giunay og pusil sa iyang kaubang polis atol sa ilang duty sulod mismo sa ilang police station diha sa lungsod sa San Francisco isla sa Camotes kagahapon sa alas 3:00 sa kaadlawon.

Ang biktima mao si PO2 Edward Barrameda, molupyo sa nahisgutang lugar apan lumad nga taga Minglanilla samtang ang suspek mao ra usab ang iyang kaubang si PO3 Ananias Mortejo, taga barangay Hinisulan sa samang lungsod apan lumad nga taga barangay Capitol Site sa dakbayan sa Sugbu.

Matud ni PO1 Jose Florentino sa San Francisco Police dihang nahinabi sa Banat News ang duha pulos on-duty niadtong higayuna kauban ang lain pang tulo ka mga polis nga sila si SPO1 George Yap, PO3 Francisco Codiñera ug PO1 Mamerod Carasina.

Subay sa imbestigasyon, si PO2 Barrameda giingong mikalit pagsulod sa radio room diin matulog ang suspek nga si PO3 Mortejo dulog sa iyang service nga M-16 Armalite rifle.

Gisusi pa karon sa kapolisan nganong sa pagmata sa suspek kalit niining girakrakan si PO2 Barrameda makadaghang higayun ug maayung pagkaigo sa iyang tuong abaga ug tunga-tungang bahin sa dughan.

Ang mga kaubang polis nga nakugang sa buto sa armas daling misusi sa radio room ug nakit-an nalang ang biktima nga nagkadugong nahagba diha sa ubos hinungdan nga gidali nila kini pagdala sa Ricardo Maningo Memorial Hospital apan gideklarar nga dead on arrival.

Ang suspek boluntaryong mitahan ngadto sa iyang mga kauban ug kagahapon sa udto gihatod dayon sa Cebu Police Provincial Office (CPPO) aron itanggong.

Ang kapolisan sa maong lungsod nagdumili una paghatag og pamahayag kabahin sa ilang imbestigasyon partikular na ang kabahin sa motibo sa suspek sa pagpusil sa iyang kauban.

Wala pa matino kun diha ba sa iyang pwesto ang hepe sa maong police station nga si Sr. Insp. Ciriaco Larrobis dihang nahitabo ang pagpamusil.

Samtang ang deputy for administration sa CPPO, Supt. Erson Digal mibutyag nga base sa ilang pakisusi personal grudge ang motibo sa pagpusil ni Mortejo kang Barrameda.

Gikatahong nasuko ang suspek sa biktima ug gipasanginlan kining maoy mikawat sa iyang upat ka mga pantalon; duha ka .38 revolvers; usa ka Super .38 Pistol ug usa ka Berreta pistol diha sa ilang buhatan.

Matud pa ni Digal nagkalalis sulod sa police station ang biktima ug suspek nga misampot sa pagpamusil. – BANAT NEWS