Talisay nakadawat og pasidungog

CEBU, Philippines - Ang kagamhanan sa dakbayan sa Talisay nakadawat og pasidungog isip Most Gender Responsive LGU niadtong Biyernes sa milabay’ng semana atol sa gipahigayong Provincial Women’s Congress sa Cebu International Convention Center sa dakbayan sa Mandaue.

Si Konsehal Shirley Belleza kinsa maoy tsirman sa hugpong sa Kababayen-an nagkanayon nga ang criteria sa paghukom sa mga napili naglangkob sa mga sumbanan sa pagtumbok sa mga kalampusan nga nahimo sa mga kababayen-an nga gibahin sa duha ka kategoriya.

Una mao ang Program Output ug Outcome sama sa pagkunhod sa maternal mortality rate ug sa kalisud sa pagkabutang.

Ikaduha mao ang Service Delivery nga naglangkob sa panglawas ug nutrisyon, edukasyon, panginabuhi, pangalagad alang niadtong mga biktima sa mga bayolenteng buhat, mga kahimanan alang sa kabayen-an, mga pamalaod, pakigduyog tali sa NGO ug CSO’s ug pagpauswag sa kusog ug gahum sa kabayen-an ug uban pa.

Si Belleza nagkanayon nga usa sa ilang labing maayong programa mao ang ilang paghatag og pakabana ngadto sa mga ‘rugby boys’ pinaagi sa gitukod nga Abante Bata Center nga anaa ibabaw nga andana sa edipisyo sa merkado sa Tabunok.

Ang maong sentro maoy dad-an sa mga rugby boys aron tudloan sila sa pagbasa ug pagsulat. Ang laing proyekto nga gipasigarbo sa siyudad hinungdan nga nakadawat sila sa nahisgutang pasidungog mao ang Tapul Environmental Scholars and Parents Association (TESPA) Grooves sa barangay Tapul diin may mga bata ang nakapahimulos sa libre nga pagtuon tungod sa maong programa.

Ang nahisgutang lugar adunay daghang mga bata nga mga kuwang sa timbang o malnourish hinungdan nga gitutokan kini sa dakbayan .

Ang siyudad ang nagtukod usab og Multi-disciplinary Team Strategy (MTS) diin ang buhatan niini nahimutang duol sa People’s Hall kansang katuyoan mao ang one-stop interview alang sa mga sexually abuse nga mga babaye ug kabataan.  - Brenda D. Batuto (BANAT NEWS)