Gipatay sa kainom

CEBU, Philippines - Patay ang usa ka mag-uuma human gipauwana’g bala sa iyang silingan kagahapon sa ala 1:00 sa kaadlawon sa barangay Mantalungon lungsod sa Dalaguete atol sa birthday party sa anak sa ilang silingan.

Ang namatay giila sa kapulisan nga si Reynaldo Sasin nagpuyo sa nahisgutang lugar nakaangkon og samad pinusilan sa ubos nga bahin sa ilok, abaga, ug uban pang parte sa lawas.

Samtang ang nakapatay mao ang iyang silingan nga si Blesilo Kabalikan, kinsa bulontaryong mitahan sa kapulisan lakip na ang paltik nga .38 rebolber nga adunay 4 ka kabhang ug usa ka buhing bala.

Si PO3 Christopher Requina sa Dalaguete Police Station nga gikahinabi sa Banat News nagkanayon nga si Sasin ug ang suspek parehong giimbitar sa birthday party sa anak sa ilang silingan nga si Jesus Calvo.

Matud pa niini nga dihang naglami na ang inom kalit lang gikwelyuhan ni Sasin si Kabalikan sa wala matinong rason hinungdan sa kasuko sa naulahi ug mibunot sa gitak-ing armas ug gipusil upat ka higayon ang biktima.

Dugang nakuhang impormasyon sa kapulisan nga ang biktima ug ang suspetsado gikatahong duna nay daang panagbangi sa mga nangaging adlaw nga maoy posibleng hinungdan sa ilang panag-away. - Guam Logroño uban sa report ni Lesley Caminade (BANAT NEWS)