Taxi driver midunggab sa kapuyong mibuwag niya

CEBU, Philippines - Arestado ang usa ka taxi drayber human giingong midunggab sa iyang kapuyo nga buot nang makigbuwag kaniya sa miaging hapon sa sitio Sangi sa barangay Pajo, dakbayan sa Lapulapu.

Ang gidakop mao si Mario Abesia, 43, taga barangay Subangdaku, dakbayan sa Mandaue samtang giila ang iyang gidunggab nga kapuyo mao si Helen Grace Geronda, 26. Si PO1 Diosdado Iran sa homicide section sa kapolisan sa maong dakbayan nagkanayon gusto nang makigbuwag sa biktima sa suspek maong wala na kini mopauli sa ilang gipuy-an sa dakbayan sa Mandaue sulod na sa pipila ka adlaw nga nakalabay.

Ang suspek miapas sa gitrabahoang establisamento sa biktima diha sa sitio Sangi sa barangay Pajo sa dakbayan sa Lapulapu aron kini papaulion.

Ang biktima gikatahong kuyog sa iyang igsuong lalaki niadtong tungura nga nanggawas sa trabahoan dihang kalit gibunlot sa suspek ug gipugos sa pagpasakay sa gimaneho niining taxi.

Apan ang igsuon sa biktima mibunlot og balik sa biktima hinungdan nga nakadagan ang dalaga palayo apan gigukod kini sa suspek nga nagbitbit na og icepick dayong dunggab sa abaga sa babaye.

Ang suspek mitahan sa mirespondeng kapolisan ug gi-turnover ang icepick nga gigamit samtang gidali pagdala sa Mactan Doctors Hospital si Geronda. - Romeo Limpangog (BANAT NEWS)