Lalaki gisud sa garbage bag

CEBU, Philippines - Usa ka gidudahang sakop sa Alpha Kappa Rho fraternity ang napalgang patay sulod sa duha ka giakob nga garbage bags kagahapon sa buntag diha sa daplin sa karsada sa Evergreen Cemetery sa habig sa South Coastal Road sa barangay San Roque, dakbayan sa Talisay.

Ang kapolisan nagdudang biktima kini sa salvaging ug padayon pang nanguha og impormasyon ang kapolisan aron mailhan ang biktima ug ingon man ang motibo sa pagpatay lakip na ang mga suspek.

Ang biktima gibana-banang nagpangidaron kini sa sobra sa 20-anyos; dunay gitas-on nga 5’6; tabonon og pamanit; dauton og panglawas; ug ang buhok niini punky style nga tupi; nagsul-ob og puwa nga sweat shirt ug itom nga short pants apan ang mga polis walay nakuhang mga identification card sa biktima.

Narekober gikan sa patay’ng lawas ang usa ka silver nga bracelet, unom ka silver nga sing-sing, usa ka Salco wristwatch, usa ka silver nga kwentas nga dunay pendant ug laing usa ka kwintas nga walay pendant ug usa ka stick sa sigarilyo ug posporo.

Ang patay’ng lawas gisulod sa duha ka garbage bag nga giakob apan gituohang sa laing dapit kini gipatay ug diha lang gilabay sa nahisgutang lugar.

Matud ni Diez nga base sa paghiling sa mga sakop sa Scene of the Crime Operative (SOCO) ang maong lalaki gituohang nianang pagka- kaadlawon kini gipatay.

Ang patay’ng lawas sa biktima ang naa karon sa Saint Francis Funeral Homes sa Natalio Bacalso Avenue, dakbayan sa Sugbo ug gipaabot sa kapolisan nga dunay mga kabanay’ng mosusi niini.

Ang patay’ng lawas dunay daghang samad pinusilan sa atubangan ug sa luyong bahin sa lawas nga maoy nakaingon sa hinanali niining kamatayon

Si PO2 Lino Diez sa homicide section kinsa maoy nag-imbestigar sa maong kaso sa pakighinabi niini sa Banat News mibutyag nga ang biktima dunay duha ka samad pinusilan sa dughan ug laing lima sa buko-buko ug usa sa walang dunggan.

Matud ni Diez nga gituohan nilang sakop sa nahisgutang fraternity ang biktima tungod sa ritual mark nga dakong paso sa tuong bahin sa kamot kilid sa iyang pulso.

Usa ka wala magpailang lalaki nga nahiagi sa lugar ang mitaho ngadto sa barangay hall sa San Roque kabahin sa maong patay’ng lawas hinungdan nga gisusi kini sa tanod nga si Renante Rabaya ug gipahibalo ang kapolisan. – BANAT NEWS