Double-dead nga karne nasakmit sa pantalan

CEBU, Philippines - Nakasakmit na usab og gidudahang ‘double dead’ nga karneng baboy ang Department of Veterinary Medicine and Fisheries (DVMF) sa Cebu City Hall kagahapong adlawa.

Ang 200 kilos nga karne, gikan pa sa Mindanao ug gisakmit sa Operation Hot Meat sulod mismo sa MV Don Martin 8 nga barko pag-abot sa pantalan sa dakbayan.

Matud sa labaw sa DVMF nga si Doctor Alice Utlang nga siya nakadawat og tip labot sa nahisgutang karne hinungdan nga kini iyang gipaatngan sa iyang mga sakop.

Ang maong mga karne giingong gisulod sa foam ug gitabunan og ginabas base sa ilang impormasyong nadawat, tuod man dihang nakit-an ang maong ginabas nadiskubrehan nga mga karne gyud ang sulod niini sa ilawom.

Walay miangkong tag-iya sa maong kargamento hinungdan nga kini gipa-blotter na lang sa mga sakop sa Operation Hot Meat ug gidala ang karne.

Ang maong mga karne gihatod ngadto sa Cebu City Zoo ug gipalawog sa mga hayop, partikular na niini ang binuhing tigre ug buaya.  

Nagkanayon si Utlang nga padayon karon nilang gihingusgan ang kampanya batok sa double dead nga mga karne ug ubang mga hot meat aron pagsigurong dili kini makalusot sa kamerkaduhan sa dakbayan tungod sa ka peligro niini sa tawo.

“Delikado man gyud nang double dead or hot meat kay wala man na moagi og inspection, so, dili na fit for human consumption,” sumala ni Utlang.

Agi og pagpalapad sa ilang kampanya miingon si Utlang nga sila na unya ang mobantay sa mga pantalan dinhi sa dakbayan sa higayon nga maaprubahan na ang giduso nga amendatory ordinance sa City Council nga alang sa maong katuyoan.

Sa kasamtangan, ang Bureau of Quarantine maoy dunay hurisdiksyon pagbantay sa pier area ug giingong igo lang makig-alayon niini ang DVMF. – BANAT NEWS