Gibunalag kahoy nga may lansang patay

CEBU, Philippines - Patay ang usa ka 28-anyos nga lalaki human kini gisundan ug gibunalbunalan og kahoy nga dunay lansang samtang naglakaw kini paingon na untang mopauli gikan nga nitambong og graduation sa bukirang bahin sa barangay Gunting lungsod sa Barili niadtong Martes sa alas 3:40 sa hapon.

Patay diha-diha ang biktimang si Alexander Caray, 28, ug molupyo sa nahisgutang lugar samtang ang suspek mao si Oliver Jimenez, nagpuyo ra usab sa maong lugar.

Matud pa ni PO3 Estillore Cañete sa Barili police dihang nahinabi sa Banat News ang biktima gikan nitambong og graduation sa high school sa maong lugar ug paingon na unta kining mopauli.

Sumala pa sa kapolisan ang suspek misunod sa biktima ug pag-abot sa mingaw nga lugar gibunal-bunalan niini og kahoy nga dunay daghang lansang ang ulo ni Caray.

Matud sa mga nakakita sa hitabo nalup-og na sa yuta ang biktima nga gibiyaan sa suspek nga nagkadugo ang ulo sa mga samad binunalan.

Gisuwayan pa unta og tabang ug gidala sa Barili District Hospital apan gideklarar kini sa mga doktor nga dead on arrival (DOA).

Ang kapulisan padayun pang nagpangita sa suspek nga nisibat human sa hitabo ug gisusi pa usab ang motibo sa krimen sanglit walay mga molupyo sa maong lugar ang nakahatag og impormasyon sa hinungdan niini. – BANAT NEWS