14 nadakpan sa drug-bust

CEBU, Philippines - Nadakpan ang 14 ka mga tawo, unom niini mga nursing student sa usa ka dakong unibersidad sa gipahigayong buybust operation sa Philippine Drug Enforcement Agency (PDEA) kagahapong adlawa.

Ang operasyon gihimo aron unta dakpon ang duha ka mga notadong drug pushers diha sa dalan F. Labra sa barangay Pasil nga giilang sila si Junrey Chavez, 29, ug Arthur Ybañez, 32, pulos residente sa maong lugar nga gihulagway nga level 3 drug pushers sa PDEA-7.

Si Jessie Tabanao, tigpamaba sa PDEA-7 mitug-an sa Banat News nga dihang ilang gisulod ang panimalay sa duha nakugang sila sa 12 ka tawong diha sa sulod nga naglakip sa unom ka mga tinun-an.

Giila ang nangadakpang tinun-an mao sila si Ralph Tamelien, 21, taga dalan Jakosalem; Sunshine Alicaya 25, taga Mabolo; Jerome Armecin, 22, taga, Nivel Hills, Lahug; Christopher Roy, 19, taga dalan Fulton sa barangay Apas; Ariel Quiliope, 22, taga barangay San Nicolas ug Dominique Cosim, 22 sa Dumlog syudad sa Talisay pulos mga nursing student ug upat kanila sakop sa Alpha Kappa Rho fraternity sumala pang Tabanao.

Lakip sa gidakop diha sa lawak mao sila si Cecilo Otero 40; Alvin Toran, 22; Eljoe Mier, 18; Jeffrey Chavez, 25; Juanito Gabriola, 34, ug Gwendolyn Marie Taniares, 32.

Sumala pa ni Tabanao nakadawat sila og report kabahin sa pagpamaligya og shabu ni Chavez ug Ybañez hinungdan nga mipahigayon sila og test buy niadtong gabii sa adlaw'ng Huwebes ug nakumpirmar nila kini.

Kagahapon sa hapon milusad sila og ikaduhang buybust operation diin si Chavez maoy mitunol sa usa ka paketeng shabu sa PDEA agent ug si Ybañez maoy gikatahong midawat sa kwarta.

Human niini gihamag dayon ang duha ug gisulod ang ilang lawak diin masakpi ang 12 ka tawo lakip ang mga tinun-an.

Matud pang Tabanao diha atubangan sa unom ka mga estudyante ang mga drug paraphernalia, tooter nga may wala matiwas nga nalanay nang shabu.

Ang mga tinun-an lakip na ang ubang mga dinakpan gikatakdang ipailawom sa drug test.

Matud pang Tabanao kasong paglapas sa RA 9165 ang ipasaka batok sa 14 ka mga dinakpan, ang klarong masang-at nga kaso batok sa mga tinun-an ug lain pang dinakpan hangtud wala pa ang drug test result mao ra ang visiting drug den.

Samtang ang duha ka mga suspek nga mipayuhot sa drugas kasuhan og kalapasan sa Section 5 sa RA 9165. – BANAT NEWS