Pagpabalik kang 'Joma' gisupak

CEBU, Philippines - Ang plano sa pagpapauli nganhi sa nasud sa founding chairman sa Communist Party of the Philippines (CPP) nga si Jose Maria Sison hugtanong gisupak sa mga anti-communist group dinhi sa Sugbo.

Si Pastor “Jun” Alcover nga maoy founding chairman sa National Alliance for Democracy (NAD) mibutyag sa Banat News atol sa Tapok-Tapok sa Kia sa Gorordo nga dako siyang supak niining planoha.

Giklaro ni Alcover nga uyon siya sa sabot-sabot alang sa kalinaw kun ang mga komunista sinsiro nga motahan sa ilang mga armas.

Matud pa niya gawas lang kun dis-armahan ang mga rebelding komunista nga sakop ni Sison, walay mahitabong kalinaw sa nasud tungod kay labi kining moisog kun ania si Sison sa nasud.

Si Alcover kinsa kanhi sakop sa NPA mipasabot nga ang paghatag og higayon kang Sison nga makapauli nganhi makahatag lang hinuon og dugang kalig-on sa puwersang komunista dinhi nga karon nagkaluya na .

Matud pa niya nga mahimong mapakyas ang kagamhanan sa gitinguha niining kalinaw sanglit ang sabotsabot nga pagahimoon maoy paghatag lamang og kahigayonan sa pagpalambo sa tinguha niining pagpukan sa demokrasya sa nasud.

Dugang pa niya nga kun kahatagan og kahigayonan ang CPP-NPA sa pagpakigsabot-sabot sa kagamhanan sa panahon sa piniliay labing siguro nga gawasnon kining magsuroysuroy dinhi sa nasud ug mahimong sakyan usab kini sa pundok oposisyon sa pagsiguro sa ilang kadaugan.  - Romeo T. Limpangog (BANAT NEWS)