Pasangil vs. TRS gihimakak

CEBU, Philippines - Gihimakak sa hepe sa Cebu Ctiy Police Office Theft and Robbery Section (TRS) ang pasangil sa usa sa mga gipasanginlang tulisan sa Fooda Supermart Fuente Branch niadtong Marso 9 nga ilahang gi-pressure ang mga testigos aron lang siya maoy itudlo.

Sa counter-affidavit ni Roy Jose Quimada, siya mipasangil nga gi-pressure ra sa kapolisan ang mga gwardiya aron siya maoy itudlong suspek aron mas mapadali ang pagpasaka og kaso ug aron usab makalingkawas sa kauwawan ang pulisya.

Si Cebu Ctiy Police Office Theft and Robbery Section Chief Senior Inspector Michael Anthony Bastes sa press conference kagahapon nagkanayon nga sa iyang panerbisyo sulod sa 20 ka tuig isip usa ka polis wala siya’y na-pressure nga mga tawo aron lang makakuha og impormasyon.

“That is not in my vocabulary. Wa gani ta ka-litik. Ang ako, tinarong gyud,” pasabot pa sa hepe.

Matud pa ni Quimada nga dili niya mabuhat ang maong krimen tungod kay suod kaayo siya sa pamilya sa tag-iya sa maong tindahan ug dili siya kaako nga motraydor sa iyang higala.

Si Bastes nagkanayon nga di lang ang mga sikyu ang ilang gibasehan pagtumbok kun si kinsa ang mga suspek, tungod kay duna silay intelligence report kabahin sa presensya sa grupo.

“Naa pa mi daghang gisaligan. Naa pay Intellegince report daan sa Mindanao. Naay official nga maka-testify nga mao nay iyang binuhatan,” pasabot pa ni Bastes.

Si Bastes nagkanayon nga ilahang sigurohong luwas ang mga gwardiyang mitumbok kang Quimada tungod kay base sa ilang impormasyon ngilngig nga grupo ug organisado ang grupo ni Quimada. -  BANAT NEWS