Duha nakuryentihan, 1 ang patay

CEBU, Philippines - Duha ka mga trabahante ang nakuryentihan nga miresulta sa kamatayon sa usa kanila sa usa sa mga dakong establisamento diha sa Ayala Business Park pasado alas 9 sa miaging gabii.

Si Sherwin Pabilya, 30, lumolupyo sa Ipil-Ipil Street barangay Mambaling usa ka sales technician sa usa ka kumpanyang nagbaligya og mga copiers ang namatay human makagunit og live nga kable sa kuryente sulod sa power room sa usa ka kumpanyang namaligya og copiers.

Samtang naangol usab ang kauban niining si Ian Yaun, 27, taga sitio Kansuhan siyudad sa Carcar nga misuway unta og tabang kaniya pagkakitang mikirig kini.

Matud pa ni SPO4 Alex Dacua sa Homicide Section, giayo ni Pabilya ang flexible wires sulod sa nahisgutang lawak dihang kalit lang kini nga mikirig.

Si Yaun pagkakita sa kauban nga mikirig daling mibira kaniya aron unta kini tabangon pagawas apan tungod sa kakusog sa boltahe sa kuryente nalagpot hinuon si Yaun palayo sa dapit.

Ang uban nang technicians nga nakakita sa nahitabo sa duha mao nay mipalong sa kuryente ug gikuha ang duha ug gipangdala sa Perpetual Soccuor Hospital apan namatay gyud si Pabilya ug gideklarar nga dead on arrival.

Si Yaun naa na sa luwas nga kahimtang tungod kay wala man kini nagrabihi base usab sa nurse nga nahinabi sa Banat News.

Dugang pa ni Dacua nga posibleng aksidente lang gyud ang nahitabo.  – BANAT NEWS