Preventive suspension vs Castro buhi pa

CEBU, Philippines - Giklaro sa Sandiganbayan nga dili mahimong moot and academic kon wala nay bili ang tulo ka bulan nga preventive suspension batok ni assistant city prosecutor ug kasamtangan hepe sa Special Board of Inquiries sa Bureau of Immigration and Deportation, Mary Ann Castro.

 Kini tungod kay wala pa gyud mapatuman ang maong suspension nga giluwatan sa Sandiganbayan nunot sa kasong kalapasan sa Graft and Corrupt Practices Act nga giatubang ni Castro tungod sa giingong pagdawat niini og P20 mil gikan ni Atty. Genes Abellana, abogado sa managsuong Jimenez nga gipasakaan og kasong pagpayuhot og gidiling drugas apan naabswelto sa asunto.

 Sa nasayran, si Castro miingon nga moot and academic ang iyang suspension tungod kay submitted for resolution na ang iyang kaso sa Sandiganbayan.

Sumala pa sa tigpamaba sa Sandiganbayan, Atty. Rene Bukar sa interview sa DyRF nga samtang pending pa ang kaso ni Castro magpabilin nga ‘enforceable’ ang maong preventive suspension.

Gitataw usab ni  Bukar nga ang mga hurado lamang sa Sandiganbayan maoy makasulti kun ang suspension ni Castro wala nay bili ug dili ang partido sa kaso, sama kang Castro.

 Gani si   Bukar mitataw nga posible pa nga mag-atubang og laing kaso si Castro tungod sa pagpataka og luwat og pamahayag nga wala masubay sa desisyon sa Sandiganbayan.

 Samtang gitataw ni Bukar nga sa iyang nahibaw-an, nasayop ang Office of Special Prosecutor sa Ombudsman sa pagduso sa ilang manifestation inay motion for execution of suspension pendente lite ngadto sa Sandiganbayan aron hingpit nga ma-serve ang suspension order batok kang Castro. – BANAT NEWS