CEBU, Philippines - Kusganong gipanghimakak sa usa sa gitumbok nga nalambigit sa nahitabong pagtulis sa Fooda Saver’s Mart sa dakbayan sa Sugbo niadtong Marso 9, 2009 ug gitumbok ang mga sakop sa Theft and Robbery Section nga mihasi kaniya.
Si Roy Jose Quimada nga molupyo sa Kawit, dakbayan sa Pagadian pinaagi sa iyang abogado nga si Atty. Luisito Arma pormal na nga miduso sa iyang counter-affidavit ngadto ni Assistant Cebu City Prosecutor Nathaniel Andal.
Si Quimada gipasanginlan nga nalakip sa pagtulis sa Fooda uban sa laing walo ka mga suspetsado.
Apan matud pa ni Quimada nga walay igong basehanan ang tanang mga pasangil batok kaniya ilabi na gyud sa pagtudlo kaniya sa mga guwardiya.
Nagkanayon siya nga ang igsuon sa usa sa tag-iya sa maong tindahan suod niya nga higala gumikan kay mao kini ang nagkugos sa iyang anak.
Gihulagway niya nga ang ilang pamilya dako’g natabang kaniya sa panahon sa iyang kalisud.
Gihulagway ni Quimada nga usa kini sa pagpanghasi kaniya sa mga sakop sa TRS ubos ni Sr. Insp. Michael Anthony Bastes.
Usa sa iyang nabantayan mao ang pamahayag sa mga testigos ug sa nabutang sa ilang pamahayag nga mitumbok kaniya nga taga dakbayan sa Dipolog bisan kun siya taga dakbayan sa Pagadian.
Mga guwardiya sa maong tindahan maoy mitumbok ni Quimada nga apil sa maong tulis. Human usab kini pakit-a sa daghang mga hulagway nga gikan sa kapolisan.
Gitumbok ni Quimada nga dakong kwestyonable ang pamahayag sa duha ka mga guwardiya nga mitumbok usab kaniya nga nagpatuong sakop sa kapolisan.
Nagkanayon si Quimada nga dugay na kaayo siyang nabalaka sa mga paagi sa kapolisan ilabi na gayud kun adunay mga dagkong hitabo aron pagsalbar sa ilang kauwawan sa mga palpal nila pagsulbad sa krimen.
Gitumbok ni Quimada nga dihay mga higayon nga ang grupo ni Bastes mianha sa KIOSK billiard hall sa dalan Osmeña Boulevard ug nangita kaniya.
Gipasabot ni Quimada nga isip tinun-an sa abogasiya gipanalipdan niya ang iyang pagka-tawo.
Gikwestyon usab niya ang pamaagi sa kapolisan sa pag–ila sa suspetsado sa krimen pinaagi lang sa pagtan-aw sa gitawag og “roques gallery”. – BANAT NEWS