Patrol Car vs. Traysikol

CEBU, Philippines - Nasubhan ang direktiba sa kapolisan sa lalawigan sa Sugbo nga mosunod sa speed limit ang mga polis sa pagpadagan sa mga patrol car sa dihang usa ka patrol car sa lungsod sa Daanbantayan nabangga ngadto sa usa ka traysikol kagahapon sa alas 10:45 sa buntag sa eskina Almirante ug Fernan sa lungsod sa Bogo.

Ang drayber sa traysikol nga may plakang GZ1071 nga si Arcelipo Lipon, taga barangay Gairan nasamdan sa ulo, samtang sa walo ka pasahero, tulo ang naangol nga sila si Felisa Andrino, 68, nabalian sa iyang batiis, 4 anyos niining apo nga si Cayla nga nakaangkon og mga bun-og sa kalawasan, ug Aillen Mefante, 18, nakaangkon usab og bun-og sa iyang lawas nga pulos taga barangay Sudlon sa nahisgutang lugar.

Gikabangga niini ang Terrano Patrol Car (SJC 640) sa Daanbantayan nga gimaneho ni PO3 Mamerto Gastador, uban sa mga kaubanan niini ug pasaherong dinakpan nga si Ulysses Rodriguez kinsa gikasohan og illegal possession of firearm.

Hinuon ang sakay sa traysikol luwas na sa makuyaw nga kahimtang human usab kini madali sa pagdala sa Severo Verallo District Hospital sa nahisgutang dakbayan, sumala pa ni PO3 George Ocena, traffic investigator sa dakbayan sa Bogo.

Ang hepe sa kapolisan sa lalawigan sa Sugbo, Sr. Supt. Carmelo Valmoria nagkanayon nga bisan pa man kun kabahin sa ilang administrative movement ang maong aksidente apan iya gihapong gipa-imbestigar ang nahitabo.

Gipasabot niini nga ang mga polis nga sakay sa maong patrol car nga gidonar sa kagamhanan sa Daanbantayan gikatahong gikan sa korte sa dakbayan sa Bogo sa sala ni Judge Apolinario Buaya nga nagpasaka og kaso batok kang Rodriguez nga nadakpan sa paghupot og armas nga walay lisensya ug nailang ten most wanted sa Ormoc City gumikan sa kasong murder.

Una niini, si Valmoria mipahimangno sa iyang mga sakop nga motuman sa lagda sa trapiko nga speed limit nga 60   kilometro matag oras   ang pagpadagan   aron malikay sa disgrasya sama sa nahitabo sa dakbayan sa Naga nga 14 ang patay sa panagbangga sa minibus ug container van.

Apan si PO3 Ocena mipadayag nga base sa iyang inisyal nga imbestigasyon, sad-an ang drayber sa traysikol kini tungod kay makita sa   point of impact sa sketch nga kini maoy midasmag sa walang bahin sa patrol car.

Samtang duna   siya'y nakitang gamay nga kalapasan sa trapiko ang nagmaneho sa   patrol car tungod kay wala kini motuman sa speed limit nga mipaturatoy lang usab sa pagpadagan bisan tuod kun didto pa kini sulod sa dakbayan hinungdan nga nakasugat og bangga sa eskina.

Hinuon mapasalamaton usab sila sa kapolisan gumikan kay dili kaayo dagkong kadaot ug wala usay mga kinabuhing nakalas atol sa panagbangga. – BANAT NEWS