Polis nawad-a'g pitaka

CEBU, Philippines - Usa ka retiradong polis kinsa nawad-an og pitaka nga may sulod nga kuwarta ug mahinungdanong mga papeles nagpakitabang sa kapolisan sa Mandaue kagahapon.

Ang biktima mao si retired Superintendent Maria De Paz Rosales, 51, nga taga dakbayan sa Sugbu.

Si PO3 Herbert Pelayo sa Police Station 1 sa barangay Centro sa dakbayan sa Mandaue mibutyag sa Banat News nga gikan sa dakbayan sa Sugbu ang maong retired police official nga nagsakay sa ilang pribadong sakyanan paingon sa lungsod sa Consolacion dihang pag-abot nila sa dalan A. del Rosario sa barangay Guizo sa dakbayan sa Mandaue, mihunong kini ug nanaog kay naghapit og pan sa bakery ug sa pagkuot pa niya sa iyang pitaka sa bulsa, nahanaw na kini.

Hinuon maoy pagtuo ni PO3 Pelayo nga natagak lang ang pitaka ni Supt. De Paz sa pagkanaog gikan sa iyang sakyanan ug napunitan kini sa laing tawo nga nahiagi niini. - Romeo T. Limpangog (BANAT NEWS)