Gonzales midepensa ni Castro

CEBU, Philippines - Gidepensahan ni Secretary Raul Gonzales sa Department of Justice (DOJ) ang kontrobersiyal nga si assistant prosecutor Mary Ann Castro kinsa maoy kasamtangang hepe sa Special Board of Inquiries sa Bureau of Immigration and Deportation kansang kaso nga giingong pagdawat og suborno napundo pa karon sa Sandiganbayan 2nd division.

Kini taliwala sa pagkwestyon nga gihimo sa pipila ka mga opisyales sa Bureau of Immigration nganong wala mapatuman ang tulo ka bulan nga preventive suspension ni Casto gikan sa giingong kaso nga pagdawat niini og P20 mil nga suborno gikan ni manlalaban Genes Abellana, ang abogado sa managsuong Jemenes nga nag-atubang og kasong pagpayuhot og ginadiling drugas apan naabswelto sa maong asunto.

Sumala pa ni Secretary Gonzales sa interview sa DYRF nga nahuman na ang maong kaso tungod kay nakahimo na siya og aksyon labot sa gipahamtang sa Sandiganbayan 2nd Division nga preventive suspension batok kang Castro niadto pang nakalabay nga tuig.

Apan niingon ang kalihim nga wala na siya makahinumdom pa kun nakapirma ba siya og kamanduan nga hingpit nagpatuman sa preventive suspension alang kang Castro tungod sa kadaghan na sa iyang gipirmahang mga papeles.

Si Sec. Gonzales mitumbok usab nga wala kaayo niya hatagi og gibug-aton ang mga kontrobersiyang estorya batok ni Castro tungod kay ang mga pasangil nga giatubang niini, resulta man sa panag-ilogay sa teritoryo sa BID-7.

Apan ang Chief Accountant sa DOJ nga si Maria Elisa B. Germar, mitumbok sa iyang sulat ngadto sa Ombudsman nga wala gyud mapatuman ang suspension ni Castro tungod kay wala siya’y nadawat nga kamanduan gikan sa labaw nga opisyal niini o kaha gikan sa Sandiganbayan hinungdan nga nagpadayon nga nagdawat sa iyang suhol ug mga benipisyo si Castro. 

Sa iyang bahin, si Castro miingon nga moot and academic na ang pagpatuman sa iyang preventive suspension tungod kay ang hearing sa maong kaso nahuman na ug gani gidesisyonan na kini sa Sandiganbayan. - Chester Abadilla (BANAT NEWS)