3 ka minibus driver positibo

CEBU, Philippines - Tulo ka mga drayber sa minibus ang migawas nga positibo atol sa roadside random drug test sa mga minibus nga gihimo sa Tuyan, Naga human mahitabo ang aksidente sa maong lugar niadtong miaging Sabado nga mikalas og 14 ka kinabuhi.

Si Land Transportation Office director Raul Aguilos nagkanayon nga ang team nakapahigayon og drug test sa 50 ka mga drayber sa minibus, apan tulo lamang kanila ang migawas nga positibo.

Sa report sa GMA-7, migawas nga positibo sa drugas mao sila si Joseph Alesna, Ronaldo Lauron ug Jony Tura, pulos drayber og minibus nga nagbiyahean paingon sa habagatang Sugbo.

Si Tura gikatahong midagan sa dihang gisita sa mga tinugyanan sa LTO sa dihang nasayran niini nga ipaubos sa drug test, apan nakorner kini ug nadakpan hangtod nga wala kini makareklamo sa dihang gi-drug test.

Sumala pa ni Aguilos nga gihimo nila ang maong roadside drug test sugod kagahapon aron masuta ang kamatuoran sa alegasyon nga kadaghanan sa mga drayber sa minibus mga adik-adik.

Ang driver’s license nilang Alesna, Lauron ug Tura gikonpiskar una sa LTO ug iduso ngadto sa ulohang buhatan, samtang ipaubos sila sa confirmatory drugtest.

Kun maprobahan sa LTO nga positibo sila sa confirmatory drugtest, pamultahon og P10 mil ang matag drayber ug konpiskahon ang ilang lisensiya.

Si Aguilos miasoy sa Banat News nga uban sa suporta sa Department of Health ug mga lokal nga kagamhanan, himuon na nga regular ang pagpahigayon og roadside random drugtest aron kasilotan kadtong mga drayber nga tiggamitan og ilegal nga drugas.

Kagahapon, ang mga pasahero mipadayag og pag-uyon sa gihimong lakang sa LTO nunot sa report nga daghan sa mga drayber sa minibus adik-adik.

Sa laing bahin, laing pampublikong mga sakyanan sa Sugbo ang gipaabot nga mag-atubang unya og problema sa prangkisa sulod niining semanaha.

Kini human suspensoha sa Land Transportation Franchising and Regulatory Board (LTFRB-7) ang prangkisa sa mga minibus sa EDC Liner human usab malambigit og aksidente sa kadalanan niadtong miaging semana ang usa sa pito ka minibus niini nga mikalas og 14 ka kinabuhi ug miangol sa pipila ka mga pasahero.

Hinuon, ang laing pampublikong mga sakyanan nga gipaabot nga mag-atubang unya og problema sa ilang prangkisa wala malambigit og road accident.

Ang nahisgutang mga sakyanan mao ang mga PUJ nga gireklamo sa kagamhanan sa dakbayan sa Sugbo tungod sa wala pagbiyahe niadtong miaging Marso 16.

Kini dihang nagprotesta ang mga PUJ driver sa gipatas-ang multa sa mga traffic violations nga gipatuman sa Land Transportation Office (LTO).

Labing minus, 13 ka mga PUJ ang nalista sa City Traffic Operations and Management (Citom) ug maoy giduso ug gireklamo ngadto sa LTFRB-7.

Matud ni LTFRB-7 Director Romulo Bernardes nga posibling karon o ugma nang adlawa nila ipagawas ang resulta sa ilang gihimo nga imbestigasyon.

Nagdumili hinuon una pagbutyag si Bernardes sa rekomendasyon sa ilang hearing officer nga si Atty. Jose Douglas Sanson.

Apan si Citom executive director Arnel Tancinco masaligon nga masuspenso o katangtangan sa prangkisa ang ilang gireklamo nga mga PUJ. – BANAT NEWS