EDC Liner kolorum gisusi

CEBU, Philippines – Gisusi karon sa Land Transportation Franchising and Regulatory Board (LTFRB)-7 ang mga report nga gawas sa pito ka minibus sa EDC Liner duna sad kini mga kolorum nga mga pasaheroan.

Ang maong minibus liner nakasugat og aksidente niadtong Sabado sa kaadlawon didto sa barangay Tuyan siyudad sa Naga nga mikalas og 14 ka mga pasahero ug duna pay laing pasaherong naa pa sa tambalanan ug kritikal ang kahimtang sa pagkakaron.

Si LTFRB-7 regional director Romulo Bernardez nagkanayon nga kini gumikan kay sa iyang nahibaw-ang report siyam ang mga minibuses sa EDC nga nagdagan.

Apan base sa ilahang rekord pito lang niini ang dunay prangkisa sa ilang buhatan.

Matud pa ni Bernardez ilaha karong susihon ang uban pa nilang rekord sa mga minibuses nga posibleng iya sa EDC nga wala marehistro ilawom sa pangalan sa maong kumpanya.

Apan giklaro hinuon ni Bernardez nga ang nadasmag nga minibus sa EDC Liner niadtong Sabado sa kaadlawon dunay prangkisa sa ilang buhatan.

Sa iyang bahin, si Land Transportation Office-7 regional director Raul Aguillos nga nahinabi sa Banat News kagahapon sa hapon pinaagi sa telepono pagkadawat sa report kabahin sa duha pa ka ‘unaccounted’ nga minibus sa EDC, mosusi usab sa ilang record.

Kini aron pagsuta kun unsa pang sakyanan nga gipanag-iya sa EDC ug kun kini padayon pa bang nagdagan ug namasahero bisan paman sa 30-days preventive suspension order sugod niadtong Lunes.

“Atong ipa-check kay basin og wala diay pud magdagan,” matud pa niya.

Si Aguillos midugang nga ilaha na usab gikumpiskar ang tanang license plates sa tanang minibus nga gipanag-iya sa EDC Liner ug iuli lang kini human sa 30 ka adlaw nga suspension.

Nitataw siya nga ang tanang drayber sa EDC Liner ipaubos gyud sa road safety seminar lakip na niini ang traffic laws aron makahibalo sa mga patakaran sa lagda sa trapiko. –BANAT NEWS