CEBU, Philippines – Makigtagbo si Gobernador Gwendolyn Garcia sa usa ka tigum karon adlaw nga Miyerkules ngadto sa mga kongresista dinhi sa Sugbo nga pabor sa balaodnon nga nagsugyot sa pagpahigayon og congressional inquiry aron mosuta kun wala bay anomaliya ang gipirmahang joint venture agreement tali sa siyudad ug sa Filinvest Land Inc.
Matud pa ni Garcia nga ang lima ka mga kongresista sa probinsiya gipaabot nga motambong sa maong tigum gawas lamang sa usa ka kongresista nga tua karon sa gawas sa nasud.
Hinuon ang gobernador miingon dili lamang mga Sugbuanong mga kongresista ang motambong sa maong meeting nga misanong sa iyang imbitasyon.
Sa mao unya nga tigum, ang gobernador gipaabot usab nga mopakita og powerpoint presentation labot sa mga puntos nga gitumbok nga anomaloso ang pirmadong joint ventures sa siyudad ug sa Filinvest nga makaapeke sa mga magbubuhis sa siyudad sa Sugbu.
Samtang si Kongresista Pablo John Garcia miingon nga atol sa maong tigum matuki usab ang pangangkon ni Mayor Tomas Osmeña nga wala pay land title nga nahatag sa siyudad apan ang Filinvest na mismo ang miangkon nga may nakuptan na silang certificate of land title aron pag-develop sa SRP. –BANAT NEWS