Talisay modugang og scholar

CEBU, Philippines - Gilauman nga ang dakbayan sa Talisay ang modugang og mga scholar nga mga estudyante sa kolehiyo pinaagi sa pagdugang og pundo sa Alay Lakad Foundation.

Si Talisay City Budget Officer ug chairman sa foundation nga si Edgardo Mabunay nagkanayon nga ang siyudad migahin og P100,000 niining tuiga alang sa mga scholar sa maong foundation diin 20 ka estudyante nga nagtungha sa Talisay City College ang makapahimulos niini. Sa miaging tuig ang dakbayan mihatag og P50 nga amot alang sa maong foundation.

Matud ni Mabunay nga bisan og ang foundation adunay makuhang abot sa matag-tuig gikan sa ipahigayong Alay Lakad, nagkinahanglan gihapon kini og dugang pinansiyal nga suporta sa siyudad ilabi na karong nagkadaghan na ang mga estudyante nga mi-apply sa scholarship program niini.

Gibutyag ni Mabunay nga aduna na silay nadawat nga mga application alang sa pagbukas sa klase niining tuiga apan dili sama sa milabay’ng mga tuig ang mga scholar, eksklusibo kining nagtungha diha sa TCC.

Si Mabunay midugang nga ang matag unit sa subject sa TCC P100-P150 lang ug duna kini 1,000 ka estudyante, diin 263 niini migradwar na sa milabay’ng semana. (Brenda D. Batuto    (BANAT NEWS)