Curfew pahugtan sa kalungsoran

CEBU, Philippines - Giawhag ni Provincial Board member Agnes Magpale ang mga mayor sa kalungsoran nga pahugtan ang pagpatuman sa curfew ordinance sa ilang tagsatagsa ka mga lugar.

Kini aron dili na mahitabo ang linuog nga mga krimen mugna sa mga batan-on sama sa nahitabo sa usa ka 13-anyos nga grade 6 dropout kinsa gi-gang rape ug gidunggab hangtud napatay sa unom ka kauban sa gang sa dakbayan sa Lapulapu niadtong nakalabay nga semana.

Matud pa ni Magpale nga angay’ng hipuson ang mga batan-on karon nga magsige og libudsuroy bisan sa tungang gabii tungod kay anang mga orasa magtapok-tapok ang mga di maayong mga pundok.

Sa obserbasyon ni Magpale ning mga panahona daghan nang mga batan-on ang nagpasakop sa mga gangs ug maoy nagtukmod usab kanila pagkagumon sa ginadiling drugas hinungdan nga makahimo og krimen.

Si Magpale niingon nga ang hugot nga pagpatuman sa curfew ordinance makatabang sa pagsumpo sa mga krimen nga himuon sa grupo sa mga minor de edad. Giaghat usab ni Magpale ang mga ginikanan nga bantayan ang ilang mga anak partikular sa panahon sa kagabhion. (BANAT NEWS)